Avisos

HORTAS URBANAS: Cambio de horario a partir do 18 de setembro: mañás de 10 a 13h e tardes de 16 a 19h.
VOLUNTARIADO SENDEIROS: Martes 19 setembro e Xoves 21 setembro. 16:15 na Pasiva ou 16:30 no Parque forestal de Maruxento

21/11/14

O Sendeiro local de Candeán: un fermoso paseo polo outono

O terceiro sendeiro local creado pola Concellería de Medioambiente en colaboración con Montes de Vigo e, neste caso, a Comunidade de Montes de Candeán, vai trascurrir polos fermosos paraxes de outono que os montes de Candeán nos ofrecen. 
Como nos casos de Saiáns e de Matamá-Comesaña a colaboración entusiasta do voluntariado de Camiño a Camiño permitiu marcar o trazado.


Partindo do Parque Forestal do Vixiador, faremos un percorrido circular por terreos da Comunidade de Montes de Candeán, que entre outros valores atesoura unha das maiores concentracións de monumentos megalíticos ou mámoas de Galicia. Algunha delas amosan as grandes laxes da estrutura interna como a casa dos mouros mentres que outras como a do Vixiador  permanecen soterradas baixo o túmulo de terra e pedras.


É o momento tamén de desfrutar  do monte no outono, das cores das árbores antes da caída da folla ou dos numerosos cogumelos que salpican o chan do bosque. O Vixiador é un dos maiores Parques Forestais do Concello, alberga unha grande diversidade de árbores, tanto autóctonas como de outras partes do mundo, así como numerosas fontes, lagoas, miradoiros, etc.


Compre ir preparados ante posibles chuvascos, típicos destas datas, con calzado axeitado e un chuvasqueiro ou similar.