5/5/14

Este domingo a clásica visita ás Illas Cíes

O domingo 11 de Maio faremos unha das visitas clásicas do Camiño a Camiño, a visita ás Illas Cíes.  Pola mañá poderemos escoller entre dous percorridos de dificultade e duración distinta. 

O percorrido mais sinxelo partirá do peirao de Cíes cara o Camping, para despois subir a Pedra da Campá e baixar de volta outra vez ó Camping.  Este percorrido ten unha lonxitude aproximada de 5,5 kilómetros.

A outra opción para facer pola mañá é un percorrido algo mais longo: achegaremonos ata o Faro de Cíes, onde poderemos disfroitar dunhas das mellores vistas das illas. Nesta opción faremos un total de 7,8 kilómetros e ten certa dificultade pola subida ao faro.

Pola tarde para, os que queiran, poderán facer outro percorrido ata o Faro do Peito (6,4 km), no extremo norte da illa. Neste percorrido coñeceremos polo miúdo algún dos sitios mais emblemáticos das Cíes, como a praia de Rodas ou o Lago dos Nenos.  Tamén veremos como se chegaron a formar as propias illas e mesmo a ría de Vigo a partir dos datos empregados polo Catedrático Jose Ramón Vidal Romaní na conferencia "Conformación das Illas Cíes" do 10 de abril.

Evolución dos areais en Cíes (documento aportado por Jose R Vidal Romaní)
Compre lembrar a necesidade de ir ben protexidos fronte o sol.  É moi importante botar crema de protección solar antes de saír da casa e ó longo do día.  Tamén é imprescindible levar unha gorra e abundante auga, aínda que o día esté cuberto.