Avisos

HORTAS URBANAS: Cambio de horario a partir do 18 de setembro: mañás de 10 a 13h e tardes de 16 a 19h.
VOLUNTARIADO SENDEIROS: Martes 19 setembro e Xoves 21 setembro. 16:15 na Pasiva ou 16:30 no Parque forestal de Maruxento

24/2/13

Voluntariado en Cies: sesión de preparación

Este sábado 23 tivo lugar en Vigozoo a sesión de preparación das accións voluntariado de camiño a camiño nas Illas Cíes. 
A Concelleira de Medio Ambiente, Chus Lago, deu a coñecer a un nutrido grupo de voluntarios e voluntarias as actuacións a realizar durante o mes de marzo, así como outras actuacións previstas ata o verán.


Voluntariado Cíes en marzo
A laboura prevista para marzo en Cíes, en colaboración co Parque nacional das Illas Atlánticas centrarase na mellora dos bosques neste espazo natural, a través da plantación de especies autóctonas (cerquiño, carballo, salgueiro e loureiro) seleccionadas pola representatividade nas illas e no litoral veciño, así como na eliminación de especies exóticas invasoras (acacia negra e eucalipto). Tamén se iniciarán a creación de microhábitats de auga doce.
O primeiro grupo de 9 voluntarios desenvolverá a súa laboura o xoves 28 de febreiro e o venres 1 de marzo. Os dous grupos seguintes faranno nas fins de semana do 9-10 e 16-17 de marzo.

Voluntariado Cíes en semana santa
 A concelleira tamén deu a coñecer que nas accións de voluntariado previstas para semana santa nas Illas Cíes están contempladas dúas quendas de 50 persoas e que, aparte de ser necesario dispór do curso de iniciación ao voluntariado medioambiental (están previsto o día 2 e 9 novas sesións, con incrición no 010 durante a semana previa) e o correspondente acordo de voluntariado, daráselle preferencia na adxudicación de prazas a aquelas persoas que teñan realizado como mínimo 4 horas de voluntariado nos distintos programas propostos (Lagares e Bouza, Areais ou Vigozoo). Tamén avanzou que este criterio extenderase ao voluntariado en Cíes durante o verán, sendo nese caso o criterio un mínimo de 15 horas.

Voluntariado en Vigozoo
Dentro da sesión, a Concelleira presentou as liñas de actuacións de voluntariado específicas de Vigozoo: educación ambiental, investigación e conservación e benestar animal. Para poder participar nestes programas é preciso contar co Curso específico de voluntariado en Vigozoo. O vindeiro 13 de abril realizarase a segunda edición do citado curso.